Samhandling mellom vidareutdanning og grunnutdanning - vidareutviklling av ikt-didaktikk

Kurset Matematikkdidaktikk for mellomsteget vart gjennomført i vårsemesteret 2009. Målet var å bruka kunnskap om digital kompetanse  frå undervisninga i grunnutdanninga, og vidareutvikla denne  i eit didaktisk kurs for mellomsteget. Dette har vidare resultert i auka bruk og integrering av ikt i matematikkfaget.

Vi la vekt på at studentane skulle læra å bruka digitale verktøy i meiningsfulle samanhengar. Studentane hadde lita teknisk erfaring med bruk av ikt, så vi laga korte videofilmar som illustrerte teknikken i situasjonar dei kjende frå arbeidet  i skulen.  Vi arbeidde og med fagstoff som er nytt i LK-06. På denne måten fekk studentane fagleg påfyll, samtidig som dei lærde å bruka eit nytt dataverktøy.

Studentane var vane med å nytta  nærmiljøet i undervisninga, men dei hadde lita erfaring med å bruka digitale verktøy som dokumentasjon på arbeidet.  Dette gjorde at vi fekk til ei samhandling mellom vidareutdanningsstudentane og høgskuletilsette, som løfta fram bruken av digitale verktøy.  Vi arbeidde med samskriving, og laga artiklar ved hjelp av artikkelverktøyet i  Fronter.  Nokre av desse publiserte vi på Geoatlas. Desse artiklane har vi seinare nytta som digitale læremiddel i lærarutdanninga. Andre artiklar la vi ut på Fronter,  og her la vi inn peikarar til videoar  frå dei sosiale nettstadene YouTube og Vimeo. Arbeidet med web 2.0 var ei ny erfaring for oss høgskuletilsette, og resulterte i at vi utvida kompetansen vår på bruk av video og korleis vi kan integrera video i grensesnitt .

Arbeidet har vore presentert på  NKUL  2009 , Nasjonal konferanse om bruk av ikt i læring og undervisning , og på ein etterutdanningskonferanse for matematikkutdannarar.  Vi har og nytta ideen og strukturen i kurset  i ei ny assistentutdanning  for barnehagetilsette.  Samla sett har kurset gitt oss i lærarutdanninga betre kunnskap om digital kompetanse og om bruken av digitale verktøy.

Les prosjektrapport.