Offisiell opning av Senter for IKT i utdanninga

Kunnskapsminister Kristin Halvorsen opna Senter for IKT i utdanninga ved ei markering i Tromsø 20. januar 2010. Sjå video frå konferansen. Les meir her: http://iktsenteret.no/

– Dette senteret skal gjere ein viktig jobb. Senteret skal hjelpe elevar og lærarar til å bli enda flinkare til å bruke digitale verkty for å nå målet om meir og betre læring, seier kunnskapsministeren.

Senteret skal arbeide for at bruk av IKT aukar kvaliteten i opplæringa, styrkjer læringsutbyttet og betrar læringsstrategane hos barn, elevar og studentar. Det har som oppgåve å spreie ny, forskingsbasert kunnskap, men også kunnskap vunnen gjennom erfaringar blant anna i skulekvardagen.

Både grunnopplæringa, barnehage og lærer- og førskulelærarutdanninga er målgrupper senteret skal jobbe opp mot. Senteret skal formidle kunnskap og forsking om bruk av IKT til både det pedagogiske personalet, og til leiarar og IKT-ansvarlege i kommunar, skular og barnehagar.

– Rettleiing om bruk av IKT i skulen skal no skje på ein betre og meir heilskapleg måte, seier Halvorsen. Det skal også samle og gjere tilgjengeleg informasjon om utdanning og yrke, og gi elevane støtte ved val av utdanning og karriere.  

IKT-senteret for utdanninga skal ha hovudkontor i Tromsø, med avdelingskontor i Oslo. I det nye senteret inngår verksemdene UNINETT ABC, Utdanning.no. og ITU - forskings- og kompetansenettverk for IT samt nokre oppgåver frå Utdanningsdirektoratet og Kunnskapsdepartementet. Senteret blir leia av Sylvi Barman-Jensen.